Монгол Ардын намын Ерөнхий Нарийн бичгийн дарга Я.Содбаатар өнөөдөр /2026.06.22/ Тусгаар тогтнолын ордонд цаг үеийн асуудлаар хэвлэлийн бага хурал хийлээ. 

Хуралд намын Нарийн бичгийн дарга Н.Энхбаатар, Ө.Золбаяр, Л.Дашдэмбэрэл, Намын байгуулалтын газрын дарга Г.Хэрлэнчулуун нар оролцов.

Ерөнхий Нарийн бичгийн дарга Я.Содбаатар өчигдөр /2026.06.21/ болсон аймаг, сумдын Иргэдийн Төлөөлөгчдийн Хурлын 2026 оны нөхөн сонгуулийн дүн гарсантай холбоотой мэдээллийг өглөө. 

Энэ жил таван аймгийн есөн суманд аймгийн Иргэдийн Төлөөлөгчдийн Хурлын 9 мандат, 15 аймгийн 37 мандат дээр сумын Иргэдийн Төлөөлөгчдийн Хурлын нөхөн сонгуулийг зарласан.   

Сонгуульд МАН-аас 42, АН-аас 40, ХҮН намаас гурав, Иргэдийн оролцооны нэгдэл нам, ИХ намаас тус бүр 1, бие даан нэр дэвшигч 5, нийт 93 нэр дэвшигч өрсөлдсөн байна. Аймаг, сумдын Иргэдийн Төлөөлөгчдийн Хурлын нөхөн сонгуулийн нийлбэр дүнг холбогдох байгууллагууд гаргажээ. 

Нийт 46 мандатаас Монгол Ардын нам 26 мандат буюу 56.5 хувиар ялалт байгуулсныг Ерөнхий Нарийн бичгийн дарга Я.Содбаатар олон нийтэд мэдээлэв. Мөн АН-аас 17 мандат буюу 36.9 хувь, ХҮН нам нэг, хоёр бие даагч сонгогджээ. 

Ялангуяа аймгийн ИТХ-ын 9 мандатад Монгол Ардын намаас нэр дэвшигчид 100 хувийн үнэмлэхүй ялалт байгуулсныг онцоллоо. Тодруулбал, Увс, Өвөрхангай, Дундговь, Төв, Дархан-Уул аймгийн ИТХ-ын нөхөн сонгуульд намын удирдлагуудын зүгээс нэлээд ач холбогдол өгч ажилласан гэдгийг тодотголоо.

Ерөнхий Нарийн бичгийн дарга Я.Содбаатар “Монгол Ардын намд итгэл хүлээлгэж, сонголтоо баталгаажуулж санал өгсөн нийт сонгогчдодоо МАН-ын нэрийн өмнөөс талархлаа илэрхийллээ. Энэ итгэлийг зүтгэлээр хариулж 2024 оны УИХ болон Орон нутгийн сонгуульд амласан мөрийн хөтөлбөрөө өндөр хувьтай биелүүлж, нийгэм, эдийн засгийн асуудлуудыг шийдвэрлэх томоохон шинэчлэлүүдийн ажлаа улам эрчимжүүлэх болно. Энэ удаагийн сонгуулийн үр дүн бол МАН-ын шинэ удирдлагын зүгээс ард түмэндээ илүү ойртож, намын дарга Н.Учрал 11 аймаг, Ерөнхий Нарийн бичгийн дарга 19 аймагт ажиллалаа. Мөн энэ өдрүүдэд “Ардын нам-Ард түмэндээ” аяныг орон даяар өрнүүлж, намын зорилго, зорилт,  Засгийн газрын бодлого, шийдвэрийг танилцуулж, иргэдийнхээ санал хүсэлтийг хүлээн авч, Enam 3.0 платформоор дамжуулан гишүүдийнхээ шинэчилсэн бүртгэлийг хийж байна. Эдгээр уулзалтын үеэр намын шинэ удирдлага, Ерөнхий сайдын татвар, тэтгэврийн шинэчлэл зэрэг томоохон реформын ажлуудыг иргэд дэмжиж байгаагаа илэрхийлж байна. Энэ нь ч ард түмний өгсөн саналаар баталгаажиж байна. Нөхөн сонгуульд ялалт байгуулсан анхан шатны байгууллага, нэр дэвшигчдэдээ амжилт хүсье” гэв.